Ökutæki skilagjald
Skráður eigandi gjaldskylds ökutækis skal á hverju tímabili greiða skilagjald fyrir hvert gjaldskylt ökutæki sitt. Skilagjaldið er innheimt með bifreiðagjaldi. Skilagjald er innheimt af bifreiðum þó að númer hafi verið lagt inn en ekki gengið frá afskráningu til úrvinnslu. Ganga þarf frá afskráningu bifreiðar hjá skoðunarstöðvum eða Samgöngustofu til að fá gjaldið fellt niður.
Skráður eigandi gjaldskylds ökutækis skv. 2. mgr. 1. gr. laga nr. 39/1988, um bifreiðagjald skal greiða skilagjald. Bifreiðar sem eru undanþegnar bifreiðagjaldi skv. 4.gr. laga um bifreiðagjald eru jafnframt gjaldskyldar.
Gjaldskylda fellur niður:
- Frá og með upphafi fyrsta gjaldtímabils eftir að greitt hefur verið skilagjald (áður úrvinnslugjald) af ökutækinu í full 15 ár.
- Fyrir bifreiðar sem eru eldri en 25 ára í upphafi gjaldaárs.
Greiðsla skilagjalds
Greiða skal eiganda ökutækis skilagjald, krónur 30.000, eftir afhendingu til móttökustöðvar til endurnýtingar eða endanlegrar förgunar, hafi ökutæki verið afskráð og skilagjald (áður úrvinnslugjald) greitt a.m.k. einu sinni af viðkomandi ökutæki. Ökutæki sem eru skráð fyrir 1980 falla ekki undir kerfið því aldrei hefur verið greitt af þeim skilagjald. Eigandi getur gefið öðrum aðila umboð til að skila ökutæki og móttaka skilagjaldið en skilagjald er einungis greitt til síðasta skráðs eigenda.
Ferlið við að skila ökutæki til úrvinnslu er að mestu orðið rafrænt og sjálfvirkt á https://island.is/ og staðfestist með rafrænum skilríkjum. Allar upplýsingar varðandi greiðslur og greiðslustöðu, eftir að ökutækinu hefur verið skilað og það afskráð, er einnig að finna þar.
Fjársýslan sér um greiðslu skilagjalds að uppfylltum skilyrðum, til frádráttar skilagjaldi koma ógreidd bifreiðagjöld og önnur ógreidd gjöld er fylgja bifreiðinni.
Ennþá er hægt að taka á móti ökutækjum með eldra fyrirkomulagi og verður svo um nokkurn tíma, meðan unnið er að innleiðingu rafrænna skila.
Nýja ferlið við skil á ökutækjum:
- Eigandi skilar ökutæki til móttökustöðvar
- Viðkomandi móttökustöð staðfestir móttöku ökutækisins
- Ökutækið er sjálfkrafa afskráð hjá Samgöngustofu
- Fjársýslan endurgreiðir skilagjald til eigenda
Hvert á að skila?
Vinsamlegast leitið upplýsinga hjá viðkomandi sveitarfélagi/móttökustöð eða á https://island.is/skilavottord hvert eigi að fara með ökutækið til að farga því.
Umboð til að afskrá ökutæki
Umboð til förgunar ökutækis